English
Konkani
2025ವ್ಯಾ ಅಕ್ಟೋಬರ್ ಮಹಿನ್ಯಾಚಾ 12 ತಾರಿಕೆರ್ ಆಯ್ತಾರಾ ಸಾಂಜೆರ್ 4 ವೊರಾರ್ ಮಿಸಾ ಸವೆಂ ಫಿರ್ಗಜ್ ಸಮುದಾಯ್ ದಿವಸ್ ಆಚರಣ್ ಕೆಲೊ. ಪ್ರಧಾನ್ ಯಾಜಕ್ ಜಾವ್ನ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಣಿಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಫಿರ್ಗಜ್ ವಿಗಾರ್ ಭೋವ್ ಮಾ| ಬಾ| ರುಡೋಲ್ಫ್ ರವಿ ಡೆಸಾ, ಮಾ| ಬಾ| ದೊ| ಪಿಯುಸ್ ಫಿಡಲಿಸ್ ಪಿಂಟೊ, ಮಾ| ಬಾ| ಅನಿಲ್ ಫೆರ್ನಾಂಡಿಸ್ ಆನಿ ಮಾ| ಬಾ| ವಿಕಾಸ್ ಪಿರೇರಾ ಹಾಣಿಂ ಸಹ ಭೆಟವ್ಣಿ ಕೆಲಿ.
ಮಿಸಾ ನಂತರ್ ವೆದಿ ಕಾರ್ಯೆಂ ಚಲವ್ನ್ ವೆಲೆಂ. ಹ್ಯಾ ಕಾರ್ಯಾಕ್ ಮುಖೆಲ್ ಸಯ್ರೆ ಜಾವ್ನ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಮಾನೆಸ್ತ್ ಜೋಕಿಂ ಸ್ಟ್ಯಾನಿ ಅಲ್ವಾರಿಸ್ ಹಾಜರ್ ಆಸ್ಲೆ. ಸರ್ವ್ ಮಾನಾಚಾ ಸಯ್ರ್ಯಾಂಕ್ ತಶೆಂಚ್ ವಾಡ್ಯಾಚಾ ಗುರ್ಕಾರಾಂಕ್ ಬ್ರಾಸ್ ಬ್ಯಾಂಡಾಚಾ ನಾದಾನ್ ಪುರ್ಶಾಂವಾರ್ ಆಪವ್ನ್ ಹಾಡ್ಲೆಂ. ಪಿ.ವೈ.ಸಿ. ಸಂಘಟನಾಚಾ ಸಾಂದ್ಯಾನಿಂ ಪ್ರಾರ್ಥನ್ ನಾಚಾದ್ವಾರಿಂ ವೆದಿ ಕಾರ್ಯಾಕ್ ಚಾಲನ್ ದಿಲೆಂ. ಮಾನಾಚೆ ಸಯ್ರೆ ಜಾವ್ನಾಸ್ಲ್ಯಾ ಅಧ್ಯಕ್ಷ್ ಸ್ಥಾನ್ ಸೊಭಯ್ಲ್ಯಾ ಫಿರ್ಗಜ್ ವಿಗಾರ್ ಭೋ| ಮಾ| ಬಾ| ರುಡೋಲ್ಫ್ ರವಿ ಡೆಸಾ, ಮುಖೆಲ್ ಸಯ್ರೆ ಮಾನೆಸ್ತ್ ಜೋಕಿಂ ಸ್ಟ್ಯಾನಿ ಅಲ್ವಾರಿಸ್, ಫಿ.ಗೊ.ಪ.ಚೊ ಉಪಾಧ್ಯಕ್ಷ್ ಶ್ರೀ ರೋಮನ್ಸ್ ಲೋಬೊ, ಕಾರ್ಯದರ್ಶಿ ಶ್ರೀ ಜೋನ್ಸನ್ ಲೋಬೊ, 21 ಆಯೋಗಾಂಚಿ ಸಂಯೋಜಕಿ ಶ್ರೀಮತಿ ಹಿಲ್ಡಾ ಮಿನೇಜಸ್, ಪೊಂಪೈ ಕೊವೆಂತಾಚಿ ವ್ಹಡಿಲ್ನ್ ಭ.ಜಯ ಆನಿ ರೋಸಾಮಿಸ್ತಿಕ ಕೊವೆಂತಾಚಿ ವ್ಹಡಿಲ್ನ್ ಭ.ಲೀನ ಪಿರೇರ ಹಾಂಕಾ ಮುಳಾವಿ ಕ್ರಿಸ್ತಾಂವ್ ಸಮುದಾಯಾಚಿ ಸಂಚಾಲಕಿ ಶ್ರೀಮತಿ ಡೆಲ್ಸಿ ರೊಡ್ರಿಗಸ್ ಹಿಣೆಂ ವೆದಿಕ್ ಆಪವ್ನ್ ಹಾಡ್ಲೆಂ. ಶ್ರೀ ರೋಮನ್ಸ್ ಲೋಬೊನ್ ಸರ್ವಾಂಕ್ ಬರೊ ಎವ್ಕಾರ್ ಮಾಗ್ಲೊ. ವೆದಿರ್ ಆಸ್ಲ್ಯಾ ಮಾನಾಚಾ ಸಯ್ರ್ಯಾಂನಿಂ ಆನಿ ವಾಡ್ಯಾಚಾ ಗುರ್ಕಾರಾನಿಂ ವಿಶಿಷ್ಟ್ ರಿತಿನ್ ಕಾರ್ಯಾಚೆ ಉದ್ಘಾಟನ್ ಕೆಲೆಂ.
ಮುಳಾವಿ ಕ್ರಿಸ್ತಾಂವ್ ಸಮುದಾಯ್ ಸಂಚಾಲಕಿ ಶ್ರೀಮತಿ ಡೆಲ್ಸಿ ರೊಡ್ರಿಗಸ್ ಹಿಣೆಂ ಪಾಟ್ಲ್ಯಾ 3 ವರ್ಸಾಂನಿ ಆತ್ಮಿಕ್ ಆನಿ ಲೌಕಿಕ್ ಸಂಗ್ತಿನಿಂ ಕಾರ್ಯಗತ್ ಕೆಲ್ಲ್ಯಾ ಸೆವೆ ವಾವ್ರಾಚಿ ವರ್ದಿ ತಸ್ವಿರೆ ಬರಾಬರ್ ಮಂಡನ್ ಕೆಲಿ. ವೆದಿರ್ ಆಸ್ಲ್ಯಾ ಮಾನಾಚ್ಯಾ ಸಯ್ರ್ಯಾನಿಂ ವಾಡ್ಯಾವಾರ್ ಚಲವ್ನ್ ವೆಲ್ಲ್ಯಾ ಖೆಳಾ ಪಂದ್ಯಾಟಾಂತ್ ಜಿಕ್ಲೆಲ್ಯಾಂಕ್ ಇನಾಮಾಂ ದಿಲಿಂ. ವಾಡ್ಯಾವಾರ್ ವಿಂಚುನ್ ಕಾಡ್ಲೆಲ್ಯಾ ವಾಡ್ಯಾಗಾರಾನಿಂ ಸಮುದಾಯ್ ಗೀತ್ ಗಾಯ್ಲೆಂ. ದೊತೊರ್ ಜೈಸನ್ ಸಿಕ್ವೇರಾ ಹಾಣಿಂ ಹೆಂ ಗೀತ್ ಘಡೊನ್ ತಾಳೊ ಬಸಯ್ಲೊ. ಶ್ರೀ ನೈಜಿಲ್ ಪೇರಿಸ್ (Lead Keyboard), ಶ್ರೀ ಶಮನ್ ಡಿಕುನ್ಹ (Bass Guitar), ಶ್ರೀ ಪ್ರೇಮ್ ರಸ್ಕಿನ್ಹ (Cajon), ಶ್ರೀ ಜೀವನ್ ಲೂಯಿಸ್ (Trumpet), ಶ್ರೀ ಫ್ರೆಡ್ವಿನ್ ಡಿಸೋಜಾ (Shakers), ಮಾಸ್ಟರ್ ಆನ್ಸ್ಟನ್ (Rhythm Keyboard) ಹಾಣಿಂ ವಾಜಂತ್ರಾ ಖೆಳವ್ನ್ ಗಿತಾಚಿ ಸೊಭಾಯ್ ಚಡಯ್ಲಿ. ಮುಖೆಲ್ ಸಯ್ರೊ ಮಾನೆಸ್ತ್ ಸ್ಟ್ಟಾನಿ ಅಲ್ವಾರಿಸ್ ಹಾಣಿಂ ಸಮುದಾಯ್ ಬಳಾಧಿಕ್ ಕರುಂಕ್ ಕೊಂಕ್ಣಿ ಭಾಸ್ ಉರಂವ್ಕ್ ಆಪ್ಲ್ಯಾ ಸಂದೇಶಾಂತ್ ಉಲೊ ದಿಲೊ.
ವಿಗಾರ್ ಬಾಪಾನಿಂ ಆಪ್ಲ್ಯಾ ಸಂದೇಶಾಂತ್ ಫಿರ್ಗಜ್ಗಾರಾಂಚ್ಯಾ ಎಕ್ವಟಿತ್ ಮನೋಭಾವಾಕ್ ಹೊಗ್ಳಿಕ್ ಉಚಾರ್ನ್ ಸರ್ವಾಂಚೊ ಉಪ್ಕಾರ್ ಬಾವುಡ್ನ್ ಬರೆಂ ಮಾಗ್ಲೆಂ. ಉಪಾಧ್ಯಕ್ಷ್ ಶ್ರೀ ರೋಮನ್ಸ್ ಲೋಬೊನ್ ಮುಖೆಲ್ ಸಯ್ರ್ಯಾಂಕ್ ಉಗ್ಡಾಸಾಚಿ ಕಾಣಿಕ್ ದಿಲಿ. ಕಾರ್ಯದರ್ಶಿ ಶ್ರೀ ಜೋನ್ಸನ್ ಲೋಬೊನ್ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಸಿ| ಜಯ ಹಿಣೆಂ ಸೆಂವ್ಕ್ ವೆಚಾ ಜೆವ್ಣಾಚೆರ್ ದೆವಾಚೊ ಆಶೀರ್ವಾದ್ ಮಾಗ್ಲೊ. ಶ್ರೀ ರೊಯ್ಲಿನ್ ಲೋಬೊನ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಹಣ್ ಕೆಲೆಂ. ವೆದಿ ಕಾರ್ಯಾ ನಂತರ್ ಫೊಂಡಾಚೊ ಮಿಸ್ತೆರ್ ಚಲನ್ ಚಿತ್ರ್ ಪ್ರದರ್ಶನ್ ಕೆಲೆಂ. ಫಿರ್ಗಜ್ಗಾರಾಂನಿಂ ರಾಂದ್ಲ್ಲೆಂ ಜೆವಾಣ್ ಸರ್ವಾನಿಂ ಸ್ವೀಕಾರ್ ಕರ್ಚಾ ಸವೆಂ ಕಾರ್ಯೆಂ ಸಂಪಯ್ಲೆಂ. ಹ್ಯಾ ಸಂಭ್ರಮಾಕ್ ಲಗ್ಭಗ್ 860 ಫಿರ್ಗಜ್ಗಾರಾಂ ಹಾಜರ್ ಆಸ್ಲಿಂ.
